Gunmen sa KTV massacre nailhan

CEBU, Philippines - Nailhan na sa kapulisan ang responsable sa pagpamanhig sa tulo sa upat ka mga tawong gipamusil patay sa usa ka KTV bar nga nahimutang diha sa barangay Mambaling ning siyudad niadtong Domingo sa kaadlawon.

Si Supt. Armando Radoc, Deputy City Director for Administration (DCDA) sa Cebu City Police Office (CCPO) nagkanayon nga ilaha na karung nailhan ang usa sa duha ka mamumuno sa pagpamanhig.

Ang pagpamusil mikalas nila ni Ramil Bayolas, 30, usa ka stay-in worker sa Cebu Quality Electroplating ug lumad nga taga Sindangan, Zamboanga del Norte; Gilbert Sabejon sakop sa Barangay Intelligence Network (BIN) taga Buhisan ning siyudad, ug laing usa nga taga barangay Gunting lungsod sa Barili nga giilang si Jackie De Dios.

Samtang ang naangol mao si Gely Laag usa ka construction worker nga taga Lipata lungsod sa Minglanilla kinsa luwas na ang kahimtang.

Matud ni Radoc nga padayon pa ang ilang hot pursuit operation batok sa mamumuno ug laing kauban niini sanglit ilaha naman kining nailhan.

Dili pa usab katug-an si Radoc kun unsay motibo sa maong krimen apan sa ilang inisyal nga imbestigasyon dunay personal nga may usa sa mga biktima nga may atraso sa mga mamumuno. - (BANAT NEWS)