Norwegian ambassador nibisita ni Gwen

CEBU, Philippines - Nakigkita kang Gob. Gwendolyn Garcia niadtong Biyernes sa buntag ang Norwegian Ambassador nga si Amb. Knut Solem kuyog sa kanhi presidente sa Cebu Chambers of Commerce and Industry nga si Consul Ben Dapat.

Giingong nahisgutan ang kabahin sa kaso ni Sven Eric Berger ug Karen Esdrelon kinsa napasanginlan nga akusado sa pagdagit ug pagpatay sa 6- anyos nga bata nga si Ellah Joy Pique. Si Solem mapasalamaton sa gobernadora sa dali nga pagkaresulbar sa maong kaso sanglit ang kalambigitan ni Berger sa usa ka dakong salaod, diin ang biktima usa ka 6 anyos dako usab kayo og ikadaot sa nasud sa Norway ug posibleng makaapektar sa maayong relasyon sa ilang nasud ug sa nasud sa Pilipinas.

Dugang pa ni Solem nga ang pagkaabswelto ni Berger gikalipay og mayo sa mga Norwegians.

Nunot sa maong kalambuan nagkasabot sila si Ambasador Solem ug Garcia nga moumol og sisterhood agreement sa nasud sa Norway ug sa probinsya sa Sugbo.

Tuyo sa maong mga opisyal nga mapalapdan pa ang maayong relasyon sa Sugbu ug sa Norway. (BANAT NEWS)