Jet ski ordinance sa Lapulapu

CEBU, Philippines - Gumikan sa trahedya sa kadagatan nga naglambigit sa mga jet ski ang kapolisan ug ang konseho sa dakbayan sa Lapulapu mohimo na og ordinansa nga mag-regulate sa mga jet skis sa kadagatan.

Matud pa ni Lapulapu City Police Office Director Sr. Supt. Anthony Obenza duha na ka kaso sa disgrasya sa kadagatan nga mugna sa jet ski tungod sa pagkaligis sa mga tawong naglangoy sa dagat.

Gumikan niini naglaraw si Obenza nga mosugyot ngadto sa konseho sa dakbayan sa Lapulapu nga momugna og ordinansa nga mag-regulate sa mga jet ski ug uban pang matang sa sakyanan sa dagat nga delikado ngadto sa mga nangaligo sa dagat.

Usa sa gisugyot ni Obenza mao ang pagpugos sa mga resorts ug dive shops nga tag-iya sa mga jet ski sa pagparehistro sa ilang mga units sa jet ski ug sa pagbutang, pangalan sa tag-iya ug numero sa kilid sa maong sakyanan.

Sa duha ka aksidente sa jet ski, walay na-trace ang kapolisan nga responsable tungod kay walay ilhanan ang mga jet skis nga nakaigo kanila.

Kun butangan og pangalan ug numero dali ra nga mailhan sa mga nakasaksi sa usa ka trahedya kung kinsa ang responsable nga makaligis og tawo sa dagat.

Samtang si Hon. Harry “Don” Radaza ang committee chairman sa turismo mipadayag sa iyang suporta sa maong sugyot ug maoy mangamahan sa maong resolusyon human niya kini matun-an.

Gisugyot usab ni Radaza nga kinahanglang adunay tukmang gilay-on gikan sa baybayon diin ang usa ka sakyanan sa dagat sama sa jet ski, banana boats ug mga pumpboats nga paabangan nga sila tugotang makaduwaduwa sa kadagatan.

Kasagaran sa mga nadisgrasya sa maong mga sakyanan mao ang mga tawo nga nangaligo sa dagat nga anaa sa mabaw nga bahin sa baybayon. (BANAT NEWS)