Estrada subling misaad nga gukdon ang mga kurakot sa gobiyerno

CEBU, Philippines - Gidasig ni Senador Jinggoy Estrada ang 182 ka mga masteral ug doctorate degree nga mga tinun-an sa Mandaue City College sa Tipolo Campus sa dakbayan sa Mandaue sa iyang pagpamulong atol sa gradwasyon nga gihimo sa Motebello Hotel sa dakbayan sa Sugbo niadtong miaging Sabado sa gabii.

Si Estrada nga maoy dinapit nga mamumulong atol sa gradwasyon sa maong mga tinun-an miingon nga ang hataas nga kinaadman nga ilang naangkon maoy magsilbing kahimanan alang sa pag-umol og mga tawo nga matinud-anon sa ilang serbisyo.

Gitataw ni Estrada ang panginahanglan karon sa katawhan maoy mogiya kanila alang sa paghimo og katarong sa atong katilingban.

Dugang pa niya nga siya sa iyang bahin iyang ipadayon ang pagbutyag sa gihimong kahiwian sa mga opisyal ug iyang gipaniguro ang paghatag og tukmang kasulbaran sa nag-una karong suliran sa nasud nga pagpangurakot sa salapi sa kagamhanan.

Si Estrada miingon nga alang kaniya labing mahinungdanon nga hatagan og unang pagtagad sa kagamhanan ang pagpahatag og kahigayonan nga makatungha ang mga kabus sama sa adbokasiya sa MCC nga gidumala ni Dr. Paulus Marie Canete sa dakbayan sa Mandaue.

Samtang si Mayor Emelita Guisadio sa lungsod sa Alegria sa iyang pamahayag miingon nga ang adbokasiya sa MCC nakahatag og dakong kahigayonan sa ilang mga magtutudlo sa Alegria nga makapadayon sa ilang pagtungha sa masteral ug doctoral degrees nga maoy nakadasig kaniya sa pagbukas usab og lokal nga kolehiyo sa ilang lungsod.

Nagtuo si Guisadio nga ang pagbaton og taas nga edukasyon sa mga kubus maoy solusyon pagpalambo sa tawo.

Gihimong ehemplo ni Mayor Guisadio iyang kaugalingon nga gikan sa kabus nga pamilya nga naningkamot sa pagtungha hangtod nga makahuman og kurso sa kolehiyo nga maoy nahimo niyang kahimanan sa pagpausab gikan sa kabus nga kahimtang.

Dugang pa niya nga kun ang kabus nga pamilya sa ilang lungsod sa Alegria kahatagan og kahigayonan nga makatungha sa barato lamang matrikula dako iyang pagtuo nga molambo pa ang ilang lungsod. (EIM) (BANAT NEWS)