Mga lote nga gibayran sa gobiyerno ipa-imbentaryo

CEBU, Philippines - Aron mahibaw-an kung pilay bayranan sa siyudad matag buwan sa mga lote nga gipamalit niini nga gipaubos sa data-data o installment basis, si Konsehal Romeo Villarante sa minority sa konseho sa dakbayan sa Talisay miduso og resolusyon nga nag-awhag sa city accountant sa pag-imbentaryo sa maong mga lote nga gidata-datahan.

Ang resolusyon Numero 2011-12-2 nga gipangamahanan ni Villarante giaprobahan niadtong Martes atol sa regular nga session sa konseho.

Si Villarante nga nahinabi sa Banat News mipasabot nga ubay-ubay nang mga lote ang gipamalit pinaagi sa installment basis, kinahanglang maimbentaryo kini aron mahibaw-an kung pilay bayranan sa siyudad matag buwan.

Matud ni Villarante nga bisan og ubay-ubay na ang mga lote nga napalit sa siyudad, ang mayor aduna gihapoy hangyo nga mamalit pa og dugang nga mga lote.

Ang uban sa maong mga lote giingong gamiton nga relocation site sa mga walay puy-anan nga mga Talisaynon.

Apan matud usab ni Villarante nga wala na silay kasayoran kabahin sa pagpamalit og yuta sa siyudad karon ug kung unsa na usab ang sitwasyon sa mga walay kapuy-an.

Dugang niya nga kinahanglan nga ang pagpamalit og yuta matukma sa development plan sa siyudad aron dili kini magkatag-katag.

Nagkinahanglan nga mahiusa usab ang lugar o lote alang sa mga kapuy-an sa walay mga puy-anan o resettlement area ug mahiusa usab ang commercial area.

Kahinumdoman nga niadtong tuig 2007 ang Commission on Audit-7 nakabantay sa 11 ka mga parsela sa lote nga napalit sa siyudad apan wala pa kini ma-titulohi ubos sa ngalan sa Talisay.

Ang maong mga lote nabayaran na sa kagamhanan sa Talisay gikan sa tuig 1998 ngadto sa tuig 2006. (BANAT NEWS)