CEBU, Philippines - Hapsay na ang dagan karon sa mga kalihokan sa buhatan sa City Administrator, karong may nagdumala na niini nga si Manlalaban James Abadia, matud pa ni Mayor Jonas Cortes.
Si Abadia maoy mihulip kang Manlalaban Briccio Boholst, ang kanhi City administrator sa Mandaue kinsa miluwat sa katungdanan sa miaging semana.
Si Abadia kinsa kanhi nag-alagad sa legal office sa dakbayan sa Lapulapu maoy nagsilbing executive secretary ni Mayor Cortes hulip ni Ernie Manatad kinsa midaug nga kapitan sa barangay Subangdaku sa miaging barangay election.
Dihang nahinabi si Mayor Cortes sa mga tigbalita iyang gipadayag nga iyang iduso ngadto sa konseho sa dakbayan ang iyang pagtudlo ni Abadia isip city administrator aron sa pagkonpirmar sa appointment niini.
Si Abadia nga mihangop sa pagpili kaniya ni Mayor Cortes sa maong katungdanan mipadayag nga nag-una sa iyang hatagan og dakong pagtagad mao ang higpit nga pagpatuman sa solid waste management program.
Sa nasayran, si Mayor Cortes kinsa hugtanon na nga nagpatuman sa Republic Act 9003 kon Solid Waste Management Act of 2001, nakaapud-apod na og mga mini dumptruck sa 27 ka barangay.
Si Cortes sa iyang pamahayag nag-awhag sa tanang barangay sa dakbayan sa pagpatukod og Material Recovery Facilities (MRF) nga maoy bahiganan sa mga basura. (BANAT NEWS)