Mga minor sa KTV na-rescue

CEBU, Philippines - Mga gituohang menor de edad nga trabahante sa Jaguar KTV Bar sa barangay Kasambagan dakbayan sa Sugbo, naluwas o na-rescue sa mga otoridad dihang gironda ang maong balay kalingawan sa mga sakop sa Regional Anti-Trafficking (RAT)-Force ug sa Inter-Agency Council Against Trafficking (IACAT) sa miaging Sabado sa gabii.

Ang International Justice Mission (IJM) ug Department of Social Welfare and Development (DSWD) miayuda usab sa maong operasyon.

Si Cathy Noveda sa IJM nga nahinabi sa Banat News kagahapon nagkanayon nga sa sayo pa adunay nadawat nga report ang mga ahensiyang hingtungdan kalabot sa mga menor de edad nga mitrabaho sa maong KTV Bar.

Ang pagpangronda gipahigayon niadtong Sabado sa alas 10:00 sa gabii ug nahuman kini kapin sa usa ka oras.

Gibutyag ni Noveda nga dunay mga gikatahapang mga dalagita ang na-rescue sa grupo apan ipaubos pa nila kini sa dental check-up aron pagpiho kung mga menor de edad ba gyud ang nahisgutang mga babaye.

Matud ni Noveda nga ang ilang mga abogado mihimo na og mga affidavit aron sa pag-andam sa kasong iduso nila ngadto sa korte.

Hinuon si Noveda wala na modugang og hatag pa og mga pamahayag kabahin sa operasyon tungod kay matud niya dili siya maoy tukmang tawo nga makahatag og impormasyon ug ang ilahang mga abogado usab namahuway kagahapon.

Karong adlawa (Lunes) gikatakdang mohatag sila og mga impormasyon kabahin sa hitabo. Ang Banat News misuway sa pagtawag sa usa sa mga abogado sa IACAT nga si “Atty. Jedrek” apan dili ma-contact ang mga numero niini sa cellphone. (BANAT NEWS)