Malapason sa trapiko pabayro'g dugo

CEBU, Philippines -    Ang pagdonar og dugo maoy usa sa mahimong paagi nga dili makabayad og kuwarta ang usa ka drayber nga madakpan sa kalapasan sa lagda sa trapiko sa dakbayan sa Mandaue.

Kini ipatuman sa kagamhanan sa maong dakbayan human sa gipalabang nga ordinansa nga gipangamahanan ni Konsehal Demetrio Cortes nga iyang giduso sa miaging regular session.

Si Konsehal Cortes sa iyang ordinansa mipasabot nga himoong alternatiba ang pagdonar og dugo sa usa ka drayber nga madakpan gumikan sa paglapas sa mga balaod sa trapiko. Ang ordinansa ni Cortes nga gititulohan og Blood for Fine Ordinance, nagpasabot nga ang pagdonar og dugo sa usa ka drayber nga malapason sa balaod sa trapiko, iyang himuon sa boluntaryong paagi.

Nagpasabot kini nga imbis kuwarta ang iyang ibayad ngadto sa kagamhanan, dugo na lang niya maoy paagason.

Hinuon gipasabot ni Cortes sa iyang ordinansa nga ang   mga drayber nga may silot nga pabayron og P500 hangtod sa P1,000 nga kantidad maoy padonaron og dugo aron dili nalang kini mobayad og kuwarta.

Hinuon gitataw ni Cortes nga kadtong mga drayber nga modonar og dugo hilngon una ang lawas niini kun dili ba masakiton. (BANAT NEWS)