CEBU, Philippines - Human ipagawas ni Gobernador Gwendolyn Garcia ang iyang conditional nga paglibkas sa iyang cease and desist order batok sa Korean Electric Power (KEPCO), ang mga opisyales sa maong kompaniya mipadala og sulat ngadto sa buhatan sa gobernador nga nangayo og despensa.
Ang Presidente ug Chief Executive Officer sa Kepco nga si Bok Yull Lee maoy nangunay sa pagpangayo og despensa sa nahitabong pagkaylap sa abog sa carbon ngadto sa mga kabalayan nga duol sa ilang planta sa dakbayan sa Naga.
Matud pa niya nga dalaygon kaayo ang gihimong lakang sa gobernadora nga naghatag og dinaliang aksyon sa suliran aron mahatagan usab dayon og kasulbaran ang reklamo sa mga residente sa dakbayan sa Naga.
Tungod sa dinaliang aksyon nga gihimo sa gobernador, gidayeg kini sa mga opisyal sa Kepco tungod kay alang kanila usa kini ka timaan sa maayong liderato ni Garcia.
Busa gipasalig ni Lee nga ang ilang kompanya mopatuman gayud pagsiguro sa mga mitigating measures aron masanta ang pagpanglupad sa mga abog sa carbon ngadto sa mga kabalayan sa maong lugar. (BANAT NEWS)