Wanted nga policewoman wala dakpa kay gipaboran?

CEBU, Philippines -  Si acting Provincial Police Office director Patrocinio Comendador mimando sa laing unit sa kapolisan nga maoy mo-serve sa warrant of arrest batok sa usa ka policewoman kinsa nag-atubang og kasong murder.

Si Comendador nakadawat og report nga ang warrant of arrest batok kang PO1 Virgilia Albarracin gitan-ugan lang diha sa Argao Police Station tungod kay ang igsuong polis sa nahisgutang suspetsado naa madestino sa nahisgutang police station.

Si Virgilia kanhi nadestino usab sa Argao Police Station apan na-dismissed siya sa serbisyo human sa hitabo tungod kay nagtago-tago na kini.

Ang Provincial Investigation and Detection Management Branch maoy gimanduan ni Comendador nga mo-serve sa warrant of arrest batok kang Albarracin.

Si Comendador nagkanayon nga iyahang susihon ang hinungdan nganong ang warrant of arrest batok sa suspetsado wala pa ma-serve ug mapaubos sa imbestigasyon ang kapolisan sa lungsod kung masuta nga duna silay pabor-pabor nga gihimo.

Ang magtiayong Albarracin maoy giingong utok sa pagpusil patay kang Alejandro Caminade, diha sa sitio Himingbongan, barangay Taloot, lungsod sa Argao niadtong Septiyembre 9, 2010 sa gabii samtang ang biktima nagduwa og mahjong diha sa balay sa iyang paryente nga si Marinel Caminade.

Si Sammy sa milabay’ng tuig misurender sa kapolisan sa Argao ug padayon kining natanggong diha sa Argao detention cell samtang ang asawa niini padayong nagtago-tago.

Ang warrant of arrest batok sa magtiayong Albarracin giluwatan ni Regional Trial Court (RTC) Judge Maximo Perez sa Branch 26 sa lungsod sa Argao niadtong Oktubre 18, 2010.

Si Senior Inspector Wilfredo Parilla, hepe sa Argao Police Station nagkanayon nga dili sila bias o may gipaboran sa hitabo ug miesplikar nga wala lang gyud silay mga kasayoran sa nahimutangan sa maong kanhi polis nga si Virgilia.

Ug hangpon usab nila kung dunay makahatag ngadto kanila og report kabahin sa nahimutangan sa kanhi policewoman aron ilaha kining masikop. (BANAT NEWS)