6 ka kapitan gikasohan

CEBU, Philippines - Unom ka barangay kapitan sa dakbayan sa Lapulapu nag-atubang og kaso sa buhatan sa piskaliya sa maong dakbayan gumikan sa kalapasan sa lagda sa “Solid Waste”.

Sila mao si kapitan ug ABC Presidente Leo Mercado sa Pajo, nga girepresentahan sa ilang chairman sa Solid Waste nga si konsehal Felomina Reyes, Lourdes Ibag sa Punta Engano, Tranquilino Omolon sa Pusok, Lucrecia Amores sa Marigondon, Allen Demataga sa Poblacion, ug Remegio Oyao sa Agus.

Base sa reklamo ni Roderico Taga-an, OIC Chief sa Solid Waste Management Office ang unom ka mga opisyal sa barangay nakalapas sa lagda sa solid waste disposal ug napamatud-an kini atol sa gipahigayong inspeksiyon nila ni Rev. Narico Nemenzo ug Mario Ymbong, pulos mga inspector sa SWMO sa maong dakbayan.

Base sa maong reklamo ang maong mga barangay naghimo og kaugalingong dumpsite, nagdaob og mga basura ug walay pagpakabana sa pagpatuman sa tukmang paagi sa paghakot sa basura.

Gumikan niini base sa Citation nga gipahamtang sa SWMO, ang Brgy. Pajo makamulta og P 3,300, Punta Engano P5 mil, Pusok P6,600, Marigondon, P16 mil, Poblacion P5,300, ug Agus P6,300.

Si Lapulapu City Mayor Paz Radaza miingon nga seryoso siya sa pagpatuman sa maong balaod ug wala siyay gipili bisan pa kung iyang kaalyado ang maong mga kapitan.

Ang mga kapitan sa barangay maoy pabayron sa maong mga kalapasan gumikan kay wala itugot sa dakbayan nga ibanan ang gahin sa barangay aron ibayad sa maong mga kalapasan. (BANATNEWS)