3 mil ka marijuana gilarot

CEBU, Philippines - Mikapin sa 3,000 ka punoan sa mga marijuana ang gipanglarot sa kapolisan didto sa barangay Basiao, lungsod sa Badian   kagahapon sa buntag.

Si Chief Inspector Timmar Jomio Alam, hepe sa Badian Police Station nga nahinabi sa Banat News kagahapon nagkanayon nga upat ka tawo diin duha niini amahan ug anak ang suspetsadong mananumay og mga marijuana diha sa lugar.

Ang mga suspetsado gikatakdang pasakaan nila og kaso apan si Alam nagdumili sa pagbutyag sa mga ngalan sa upat kinsa padayon pa nilang gipangita tungod kay nakaikyas kini.

Matud ni Alam nga niadtong Marso 24, 2011 nakasakmit ang kapolisan og 11.5 ka kilong pinaugang dahon sa mga marijuana ug 1,200 ka mga lubangon sa marijuana ang ilang nalarot usab sa nahisgutang lugar.

Sa unang pagronda, naaktohan sa mga polis nga usa sa mga suspetsado naglukdo og sako nga gisudlan sa mga pinaugang dahon sa marijuana apan dihang nakabantay kini nga adunay mga polis, gibuhian ang sako og mikababad og dagan.

Ang suspetsado matud ni Alam wala na nila maabti tungod kay nasaag sila sa agianan.

Kagahapon sa ilang operasyon ang nahisgutang mga marijuana nalarot sa mga polis sa luna nga adunay gilay-ong upat ka kilometro gikan sa unang luna nga ilang gipanglarotan sa maong   tanom niadtong miaging semana.

Ang mga marijuana nga nalarot kagahapon gidala sa kapolisan sa ilang police station.

Si Alam mibutyag usab nga base sa ilang nahipos nga report ang mga marijuana nga gipananom sa maong lugar dili lang lungsod sa Badian ang ilang suplayan niini kundi lakip na nagkalainlaing lugar sa Negros Oriental.

Ang barangay Basiao adunay gilay-ong 10 ka kilometro gikan sa lungsod.

Uban sa operasyon kagahapon sila si Inspector Robert Nodalo Lucernas, PO3 Jeremias Elardo, PO3 Emmanuel Caballero, PO1 Fortunato Purgaturyo, PO1 Mauro Gramatica Jr., PO1 Roland Alo ug tulo ka mga volunteer ug usa ka guide. (BANATNEWS)