Kolektor gitulis gipatay

CEBU, Philippines - Usa ka kolektor sa usa ka lending firm ang gitulis ug gipatay sa wala pa matumbok nga mga tulisan samtang ang biktima sakay sa motorsiklo gikan nga naningil diha sa barangay Dapdap lungsod sa San Remegio niadtong Huwebes sa alas 3:08 sa hapon.

Ang biktima nga namatay diha-diha mao si Gilbert Montellano Mitante, 24, molupyo sa sitio Looc barangay Nailon siyudad sa Bogo ug kolektor sa Cooline Lending nga nagbase gihapon sa Bogo.

Matud ni PO3 Joejohnnesky Ynot, imbestigador sa San Remegio, Police Station dihang nahinabi sa Banat News nakit-an sa mga molupyo ang patay’ng lawas sa biktima nga nagbuy-od na tupad sa iyang motorsiklo diha sa maong lugar.

Ang municipal health officer nga si Dr. Edgar Espinosa mikonpirmar nga patay na ang biktima human makaangkon og samad pinusilan sa bukobuko nga milapos sa dughan agi sa wala pa matinong kalibre sa armas. Subay sa imbestigasyon, gituohan nga tulis ang motibo sa krimen sanglit wala naman ang iyang bag nga maoy gisudlan sa iyang koleksiyon sa mga utangan.

Wala pa usab matino sa kapulisan ang kantidad sa kwarta nga nasakiyo gikan sa biktima. (BANATNEWS)