Mikawat sa karosa naabtan

CEBU, Philippines - Nagtingkagol sa Talisay City detention cell ang usa ka 18-anyos nga lalaki kinsa giingong mikawat sa karosa sa Our Lady of Consolacion Parish sa barangay San Roque, dakbayan sa Talisay niadtong Miyerkules sa hapon.

Ang suspetsado mao si Jason Zanokia, taga Saint Jude Subdivision, barangay Bulacao, dakbayan sa Sugbo. Si Padre Domingo Saladaga, ang Padre Kura sa maong simbahan uban sa ilang drayber nga si Marcelino Seran, 40, mianha sa Talisay City Police Station sa barangay Poblacion kagahapon sa buntag miluwat og affidavit aron pasakaan og kaso si Zanokia sa giingong pagpangawat niini sa karo nga nagkantidad og P40 mil.

Base sa imbestigasyon sa mga polis nga si Zanokia nabantayan sa janitor nga si Filomeno Nadal nga paingon nang mogawas sa compound sa simbahan nga nagmaneho og traysikad karga ang gi-dismantle na nga karo.

Si Seran ug Padre Saladaga nga nahinabi sa Banat News kagahapon nagkanayon nga si Zanokia nangayo og pasaylo ngadto kanila sa iyang gibuhat apan ang inahan niini nangangkon nga mamalitay o canvasser og mga scraps ang iyang anak.

Apan nasuta nga ang timbangan nga dala sa suspetsado walay kamot ug wala usab kini gipakitang kwarta nga isip puhonan sa pagpamatuod nga mamalitay siya og mga scraps. (BANATNEWS)