PSG apil pagbantay atol sa 'Sugat'

CEBU, Philippines -  Mopadala na og suwat si Mayor Michael Rama ngadto sa mga parish security volunteers aron hangyuong motabang sa seguridad alang sa nagsingabot nga pagtimaan sa Semana Santa partikular sa Huwebes Santo, Biyernes Santo ngadto na sa adlaw'ng Domingo diin himuon ang tradisyonal nga Sugat.

Matud pa sa mayor nga mapalig-on ang pagbantay sa kahapsay ug kalinaw sa simbahan kung dunay kooperasyon ang nagkadaiyang grupo sa kapulisan ug ang mga parish security volunteers. Aminado si Rama nga   naandan na ang mga dagkong kalihukan sa Simbahang Katoliko panahon sa semana santa.

Naandan na nga modagsa ang mga tawo ilabi na ang mga turista panahon sa Biyernes Santo ug Sugat.

Masaligon hinuon si Rama nga duna na’y nahan-ay nga mga plano ang kapulisan sa pagpatunhay sa seguridad sa tibuok siyudad nga gitawag Task Force Semana Santa.

Nasayran nga ang kapulisan motutok sa mga lugar nga dunay mga kalihukan sa Semana Santa ingon man usab ang sitwasyon sa pier ug mga terminal. Mipahimangno usab si Rama ngadto sa mga negosyante nga kanunay mobuhat usab og hugot nga pagbantay sa ilang mga establisamento aron malikayan ang mga tulis.

Partikular nga gipaalerto sa mayor ang mga money changer, banko, cell shop, pawnshop ug uban pa. (BANATNEWS)