CEBU, Philippines - Patay ang usa ka 53-anyos nga biyuda human kini madumbuli og motorsiklo sa iyang pagtabok sa karsada sa highway sa sitio Sepaway barangay Luray-2 siyudad sa Toledo niadtong Miyerkules sa alas 4:35 sa hapon.
Ang biktima mao si Elioteria Asuzenas Gabiana, 53, molupyo sa nahisgutang lugar samtang ang drayber sa motorsiklo nga nakadasmag mao si Richard Dinajora Sayson, 24.
Matud ni SPO3 Carmelito Hornales sa Toledo City Police station dihang nahinabi sa Banat News subay sa imbestigasyon ang motorsiklo gikan sa barangay Poblacion paingon sa barangay Sangi.
Pag-abot sa maong lugar kalit nga milabang sa karsada ang biktima ug wala mabantayi ni Sayson nga niadtong tungora naghaguros og padagan ug nadasmagan gyud ang biktima.
Ang biktima nalamba sa sementadong dalan ug giingong nabunal ang ulo, ang mga estambay sa lugar maoy daling mitabang sa biktima ug gihatud dayun kini sa Toledo City District Hospital apan human sa usa ka oras nabugto-an gyud kini sa kinabuhi.
Samtang ang drayber sa motorsiklo boluntaryo sab dayung mitahan sa kapulisan ug nagtingkagol na sa karsel human gihikay na ang kasong ipasaka niini sa korte.(EIM) (BANATNEWS)