Manag-uyab mitulis sa taksi

CEBU, Philippines - Naminghoy nga midangop sa kapulisan ang usa ka drayber sa taxi human kini gitulis sa iyang babaye ug lalaking pasahero nga nagpahatod kaniya sa barangay North Poblacion siyudad sa Naga kagahapon sa alas 3:00 sa kaadlawon.

Ang biktima nga nahurot gyud ang tibuok adlaw ug gabii nga kinitaan sa pagpamasahero mao si Lolito Mancao, 26, taga barangay Dumlog siyudad sa Talisay nga nagmaneho sa Marivic Taxi nga dunay plaka nga GXF-488.

Samtang ang mga responsable gihulagway lang sa biktima nga usa ka batan-ong lalaki ug babaye nga una na niyang gituohan nga maghinigugma-ay.

Matud ni PO3 Bernard Otida sa Naga Police dihang nahinabi sa Banat News ang mga suspek gikan kini sa Mango Avenue sa dakbayan sa Sugbo nianang kaadlawon ug mipara kaniya ug nagpahatud sa siyudad sa Naga sa kantidad nga P500.

Apan dihang naabot na sila sa maong lugar nimando ang lalaki sa paghunong ug dihang nakalugar na siya giti-onan dayun ang iyang ulo sa suspek nga lalaki og armas ug miingon nga “kwarta ray amo, ihatag lang na aron di ka maunsa.”

Tungod kay diha sa iyang luyo ug sa kahadlok nga pusilon gitunol nalang niini ang iyang P2,300 nga kinitaan, human madawat sa mga tulisan dali silang nanganaog paingon sa hilit nga lugar.

Ang biktima midangop sa buhatan sa kapulisan aron ipa-blotter ang hitabo. (BANATNEWS)