Cebu City, Toyoflex mipadala og hinabang sa biktima sa tsunami

CEBU, Philippines - Pormal na nga gitunol kagahapon ang hinabang sa Toyoflex Cebu Corporation uban sa kooperasyon sa kagamhanan sa siyudad sa Sugbo ang P1.1 milyon alang sa mga nabiktima sa tsunami ug linog didto sa Japan.

Ang maong kantidad gitunol ni Mayor Michael Rama kagahapon ngadto kang Japanese Consul Yoshiaki Hata.

Ang maong salapi nga gipakapinan usab og lima ka libo nga mga T-shirts adto idiretso sa Japan Red Cross ug sila na’y moapud-apod niini alang sa nagkadaiya nilang operasyon sa maong nasud.

Si Hata mapasalamaton sa Toyoflex ug sa siyudad sa Sugbo gumikan kay naghuna-huna gyud kini sa kahimtang sa ilang nasud.

Samtang si Rama mipadayag nga dunay natampo ang mga Hapon sa pagpalig-on sa atong ekonomiya, gani pipila niini maoy katambayayong sa siyudad sa nagkadaiya nila nga proyekto sama sa imprastraktura.

Gipahibalo usab niya nga giproseso na usab karon sa siyudad ang lain pud nila nga hinabang alang sa Japan ug dili pa niya matino kung pila ang kantidad niini. (BANATNEWS)