Napolcom mihimakak sa pasangil

CEBU, Philippines - Ang National Police Commission (NAPOLCOM)-7 mihimakak nga sakop sa ilang ahensiya ang tulo ka mga private investigator kinsa giingong mipahigayon og imbestigasyon bahin sa pagdagit ug pagpatay sa 6-anyos nga bata nga si Ellah Joy Pique.

Ang NAPOLCOM miawhag kang Senior Superintendent Patrocinio Comendador, officer-in-charge sa Cebu Provincial Police Office (CPPO) sa paghatag sa mga ngalan sa nahisgutang mga tawo aron makatabang ang nahisgutang ahensiya sa pagsusi ug pagpahigayon og imbestigasyon sa giingong mga private investigator.

Si manlalaban Zandro Oriol, Public Information Officer (PIO) sa NAPOLCOM nagkanayon nga tulo ka mga tawo kinsa giingong mga private investigator sa nahisgutang kaso nagpaila nga mga sakop sa NAPOLCOM.

Apan sa ilang pakisusi ang NAPOLCOM central office ingon man ang ilang rehiyonal nga buhatan wala magpadala og mga pribadong imbistigador aron mopahigayon og imbestigasyon sa kaso.

Ang NAPOLCOM mihatag og direktiba ngadto sa kapolisan nga mopasaka og kasong kriminal batok sa giingong mga private investigator.

Dugang pa niya nga ang NAPOLCOM mihatag sa tibuok nilang suporta ngadto sa kapolisan sa paghatag og hustisya sa kamatayon ni Pique.

Si Comendador sa sayo pa nakadawat og report nga ang ilang mga witness nga taga lungsod sa Minglanilla giingong gihasi sa mga private investigator nga gi-hire sa mga sinumbong.