Kong. Ruben Ecleo dakponon

CEBU, Philippines - Si PBMA Supreme Master ug Dinagat Island Congressman Ruben Ecleo Jr. sa pagkakaron dakponon human kanselaha sa korte ang piyansa niini sa kasong parricide nga giduso batok kaniya.

Kahinumdoman nga si Ecleo maoy suspetsado sa pagpatay sa iyang asawa nga si Alona Bacolod-Ecleo.

Base sa report sa ABS-CBN Central Visayas nga si Ecleo tulo na kahigayon nga wala motambong sa hearing sa iyang kaso.

Si Regional Trial Court (RTC) Judge Soliver Peras sa Branch 10 miluwat og hukom kagahapon sa hapon sa pagbasura sa piyansa ni Ecleo nunot sa hangyo sa prosecution nga ipadakop na si Ecleo tungod sa kapakyas niini sa pagtambong sa mga bista sa iyang kaso.

Ang P1 milyon nga piyansa ni Ecleo alang sa iyang temporaryong kagawasan aron magpaubos kini og heart bypass surgery, giwad-an na og bili sa korte.

Si Peras miluwat dayon og warrant of arrest batok kang Ecleo ug ang Criminal Investigation and Detection Group (CIDG) CARAGA region gimanduan ni Peras nga maoy mosilbi niini ngadto kang Ecleo.

Ang CIDG CARAGA maoy may hurisdiksiyon sa Dinagat Island diin si Ecleo magpuyo.

Gimanduan na usab sa korte ang depensa nga angayang mopaubos na sa heart bypass surgery si Ecleo sa dili pa ang Mayo 8, 2011.

Ang depensa nasagmuyo sa nahisgutang desisyon sa korte apan ang abogado ni Ecleo nga si manlalaban Orlando Salatandre nagkanayon nga andam silang mosumiter og motion for reconsideration.

Matud ni Salatandre nga ang kaso ni Ecleo sa Sandiganbayan maoy usa sa hinungdan nga wala kini makatambong sa hearing sa iyang kaso dinhi sa Sugbo.

Niadtong tuig 2004 si Regional Trial Court (RTC) Judge Generosa Labra sa Branch 23 mitugot nga si Ecleo makapiyansa tungod sa sakit niini sa kasing-kasing.

Kini dihang gipamatud-an sa usa ka doctor nga si Ecleo susama sa usa ka bombang talibuto.  - BANAT NEWS