CEBU, Philippines - Mga manindahay diha sa karaang merkado sa barangay Tabunok, dakbayan sa Talisay gikatakdang isuroy ngadto sa bag-ong merkado sa barangay Lagtang matud ni Konsehal Edward Alesna, chairman sa committee on slaughter house and market operation.
Si Alesna nga nahinabi sa mga tigbalita nagkanayon kini nga ang matag-section sa manindahay diha sa Tabunok gipatawag aron pahibaw-on sa planong isuroy sila ngadto sa bag-ong merkado aron makakita sila sa sitwasyon sa lugar.
Matud ni Alesna nga ang bag-ong merkado limpiyo ug nindot ang mga pasilidad ug komportable ang mga manindahay kompara sa karaang merkado nga makitang hugaw na kaayo ang palibot.
Gibutyag usab sa konsehal nga dunay mga manindahay diha sa karaang merkado nga nanag-iya og sobra sa usa ka stall ug dili na nila kini itugot nga sistema ngadto sa bag-ong merkado. Ang konsehal midugang nga ang tanang manindahay diha sa karaang merkado sa Tabunok masigo sa bag-ong merkado sa Lagtang.
Kahinumduman nga ang mga manindahay diha sa karaang merkado mibahad nga mag-rally kung pabalhinon sila ngadto sa bag-ong merkado, usa sa ilang rason mao ang kakulangon sa stalls ug dili sila maigo diha sa bag-ong merkado dugang pa ang katuyuon niini. - BANAT NEWS