KEPCO nangayo og pasaylo

CEBU, Philippines - Nangayo og pasaylo ang mga kadagkoan sa Korean Electric Power –Salcon Power Corporation (KEPCO-SPC) ngadto ni Gob. Gwendolyn Garcia tungod sa kahasol nga namugna sa abog gikan sa ilang planta.

Ang Presidente ug Chief Executive Officer sa Kepco nga si Bok Yull Lee mipadala og suwat sa gobernador ug nangayo og pasaylo sa nahitabong pagkaylap sa abog sa carbon coal ngadto sa mga kabalayan nga duol sa ilang planta sa dakbayan sa Naga.

Matud pa niini nga dalaygon kaayo ang gihimong lakang sa gobernadora nga naghatag og dinaliang aksyon aron mahatagan dayon og kasulbaran ang reklamo sa mga residente sa dakbayan sa Naga. Si Garcia bag-ohay lang milibkas sa pagsuspenso sa paghakot sa mga coal ores ug sa coal ash diha sa maong planta human mohimo og dinaliang solusyon ang Kepco nga nakapawagtang na sa abog.

Ang mga residente mireklamo ngadto kang Mayor Valdemar Chiong tungod sa grabeng abog gikan sa maong planta nga nakaingon sa kahugaw na sa ilang palibot ug nabalakang masakit sa baga tungod niini. Gisiguro karon ni Lee nga gihimo na nila karon ang malungtarong solusyon aron dili na makahasol sa mga residente sa maong dapit. - BANAT NEWS