Transport groups sa CV makapahimulos sa oil subsidy sa gobiyerno

CEBU, Philippines - Gipahibawo sa Department of Energy kon DOE-7 nga mapahimuslan na sa mga drayber sa Public Utility Vehicle (PUVs) ug mga traysikol drayber dinhi sa tibuok Central Visayas ang fuel subsidy nga gihatag ni Presidente Benigno Simeon ‘Noynoy’ Aquino III aron makatapak sa ilang kinitaan taliwa sa padayong pagsaka sa presyo sa produktong petrolyo.

Gibutyag ni DOE-7 Regional director Antonio Labios dihang nahinabi sa Banat News nga pagkakarun ang implementing guidelines nalang ang ilang gipaabot human gipagawas sa Malakanyang ang Executive Order #32 nga naghatag sa tanang detalye sa gihatag nga oil subsidy sa gobiyerno ngadto sa mga PUJs ug traysikol lukop nasud.

Daan nang miangkon ang Palasyo nga dili malungtarong solusyon ang pag-subsidized sa oil price apan sa pagkakaron wala pay nakit-ang klarong solusyon sa problema ang gobiyerno maong ilaha kining buhaton.

Kagahapon, usa ka gasoline station diha sa dalan MJ Cuenco ang mipatuman na og pisong diskwento sa matag litro sa diesel sa ilang produkto, butang nga gipasalamat sa pipila ka mga drayber.

Matud ni Labios nga kun madawat na nila ang implementing guidelines isunod dayun nila ang pagpahigayun og information dissemination ngadto sa transport sectors.

Ang pagtapak sa gobiyerno sa presyo sa lana gihimo samtang wala pa ka-aprobahi ang gidusong petisyon alang sa dugang pletihan sa mga drayber.

Ang pag-subsidize sa presyo sa lana gibana-banang molungtad lamang sa usa ka bulan apan mag-agad kini sa dagan sa presyo sa petrolyo sa kalibutanong merkado.  - BANAT NEWS