Polis nga naeskapohan gikostudiya

CEBU, Philippines - Gipaubos sa camp restriction ang polis sa Mabolo Police Station nga giingong giiskapohan og dinakpan sa pagpanglugos niadtong Sabado kini base sa kamanduan ni Sr. Supt. Melvin Ramon Buenafe.

Si PO1 Llyod Magdadaro anaa karun sa floating status ug kasamtangan una siyang gikustodiya sa Investigation and Detective Management Branch (IDMB) ug City Intelligence Branch (CIB) sa Cebu City Police Office (CCPO) kinsa mipahigayon og makuting imbestigasyon sa maong insidente.

Si Chief Insp. Romeo Santander, hepe sa CIB nagkanayon nga ilang giimbargohan sa iyang service firearm si Magdadaro.

Samtang si Chief Insp. George Ylanan, hepe sa IDMB nga nahinabi sa mga tigbalita nagkanayon dili lang si Magdadaro ang sentro sa ilang imbestigasyon kundili lakip na ang tanang ni-duty niadtong higayona diha sa Mabolo Police atol sa maong insidente.

Lakip sa giimbestigar ug gimanduan patubagon mao sila si SPO2 Fe Altobar sa Women’s and Childrem’s Desk Protection ug PO3 Raymundo Ratso, desk officer on duty niadtong higayona.

Matud pang Ylanan lakip sa ilang susihon kun maigo ba sa command responsibility ang hepe sa Mabolo Police Station nga si Chief Insp. Aureo Sanchez depende sa tubag unya sa tulo ka mga polis.

Susihon usab sa IDMB kun duna bay proper turnover sa dinakpan gikan sa tanod ngadto na sa mga polis sa maong buhatan.

Kahinumduman si Lysander Pardilla nga taga Bolton St., sa barangay Lahug, usa ka Internal Security sa Philippine Amusement and Gaming Corporation (Pagcor) gipasanginlan sa usa ka 22-anyos nga dalaga nga milugos kaniya sa usa ka motel niadtong Sabado.

Si Santander nagkanayon nga ilaha karung gipalawman og maayo ang imbestigasyon gumikan kay dili simple ang kasong pagpanglugos ug kinahanglan tubagon kini sa suspetsado.

Si Magdadaro nagdumili hinuon paghatag og komentaryo sa maong hitabo sa dihang buot unta siyang kuhaan sa mga sakop sa media kagahapon diha sa CCPO apan siya mitataw nga ang iya nalang abogado maoy motubag niini.

“Hinaot nga masabtan ninyo akong side,” matud pa niya kinsa midugang nga andam niyang atubangon ang imbestigasyon nga gihimo sa duha ka units sa CCPO.

Human unya sa imbestigasyon kun si Magdadaro mapamatud-ang sad-an lakip na ang laing duha mag-atubang sila og kasong grave misconduct.  - BANAT NEWS