Negosyante sa Sugbo pakigkitaan ni Rama

CEBU, Philippines - Tigomon sa kagamhanan sa siyudad sa Sugbo ang mga mamaligyaay sa kadalanan aron mapahimangnoan sila sa hugot nga pag-implementar sa “No Segregation, No Collection” policy sa ilang mga basura.

Sumala pa sa mayor nga dako og kontribusyon ang mga negosyante sa kadalanan sa tulin nga pag-implementar sa nahisgutang polisiya sanglit sila man ang kanunay nga makit-an sa katawhan.

 Ang mga manindahay ra usab ang maapektohan kung dili nila tarungon paghipos sa ilang basura gumikan kay magpasad ra kini duol sa ilang mga puwesto.

Gipahibalo sa mayor nga moduaw siya og usa ka lugar sa Naga aron susihon ang proposal ni Mayor Val Chiong sa posibleng bakanteng dumpsite sa maong lugar nga mahimong kalabayan sa mga basura sa dakbayan sa Sugbo.

Sumala pa ni Rama nga dili pa siya makahatag og dinalian nga desisyon gumikan kay kinahanglan pa kini ipaagi og mga konsultasyon.

 Gipadayag hinuon sa mayor nga walay angayang dalian sa pagpangita og dumpsite sanglit ang hingpit ra gyud nga pag-segregate sa basura maoy nag-unang solusyon sa nagkadaghan na nga basura sa dakbayan.