CEBU, Philippines - Si Kapitan Manuel Cabriana sa barangay Tabunok mibutyag nga wala siya’y kalibutan nga ang ilang minibus gamiton sa mga supporters sa suspek sa pagdagit ug pagpatay sa 6-anyos nga mao si Bella Ruby Santos.
Si Santos maoy usa sa gitumbok nga midagit ug posibleng mipatay kang Ellah Joy Pique kansang kaso karon nag-ungot sa korte. Lakip sa gikasuhan ang uyab ni Santos nga Briton nga si Ian Charles Griffiths.
Niadtong Biyernes nakuhaan og hulagway sa usa ka pamantalaan ang mini-bus sa barangay Tabunok nga maoy gisakyan sa mga supporters ni Santos kinsa mitambong sa hearing sa kaso niini diha sa Palace of Justice niadtong Biyernes.
Matud ni Cabriana nga ang ilang minibus paabangan sa barato nga presyo tungod kay ang tumong nila makatabang ug makaserbisyo.
Kasagaran nga moabang sa mini bus sa ilang barangay kadtong mga grupo nga mag-outing ug magpahigayon og field trip.
Gibutyag ni Cabriana nga usa ka Beth Rabaya ang miduol sa barangay hall ug nangutana kung masigo ba ang 50 ka mga bata sa mini bus tungod kay ilaha kining abangan.
Matud ni Cabriana nga ang nahisgutang nag-inquire nagpaila nga higala ni Bokal Julian Daan.
Sumala pa niya P500 ang ilahang paabang isip “maintenance” apan ang moabang mao nay mag-abaga sa krudo ug sa suholan sa drayber apan mihangyo si Rabaya nga P300 lang tungod kay anha lang sila sa Kapitolyo ug mga bata usab ang pasakyon.
Tungod kay mga bata man ang manakay misugot si Cabriana sa P300 nga abang ug iyaha kining giisyuhan og trip ticket.
Nakugang nalang siya dihang iyang nahibaw-ang mga supporters ba diay ni Santos nga motambong sa hearing niini ang mosakay ug dili mga bata. - BANAT NEWS