Pagbahig sa basura problema gihapon

CEBU, Philippines - Nagkinahanglan pa gyud og hingpit nga pagpasabot ang mga tawo kalabot sa pagbahig sa ilang mga basura gumikan kay hangtud karon aduna pa gyu’y uban nga wala motuman niini.

Kini maoy gibutyag sa konsehal sa Barangay Kalunasan nga si Marvin Leyson kinsa amenado nga may mga basurahan pa sa mga kadalanan sa ilang barangay nga wala makolekta sa ilang mga garbage collector tungod kay wala mabahig.

“Among gibuhat karon ang pinaspasay nga pag-apod apod sa impormasyon bahin sa tukmang paghipos sa basura,” matud pa ni Leyson.

Dugang pa niya nga kinahanglan kaayo ang kooperasyon sa katawhan alang sa kalamposan sa pagpatuman sa maong pamaagi gumikan kay kung dili sila motuman niini, ang ila ra usab   nga palibot maoy magsagubang sa kabaho.

Kini kay matud pa niya higpit gayud ang ilang pagpatuman sa “No Segregation, No Collection Policy” sa siyudad sa Sugbo.

Samtang ang konsehal sa Barangay Apas nga si Allan Majait amenado nga aduna gihapo’y mga tawo ang nagpabadlong sanglit ibutang sa ilawom ang nagsagol nga basura ug paibabwan lang kini sa gibahig na nga basura .

“Among gibuhat karon kay dili na namo isakay ang mga sako sa garbage truck, among ihu-ho daan aron makita namo kung nituman ba gyud sila sa balaod,” suma pa ni Majait.

Ang barangay Apas adunay Material Recovery Facilities busa estrikto gyud ang pagkolekta sa ilang mga basura. Dugang pa niya nga matag garbage truck ila gyud nga gipasundan og Barangay Environment Officers aron masilotan ang mga tawo nga dili motuman sa balaod.

Samtang si Mayor Michael Rama nanawagan pagbalik sa publiko nga motuman gyud unta sa balaod aron dili maguba ang imahe sa siyudad.   - BANAT NEWS