P5M Cocaine nasakmit

CEBU, Philippines - Mokabat og P5 milyones nga kantidad sa usa ka brick nga cocaine ang nasakmit atol sa buybust operation sa mga sakop sa Philippine Drug Enforcement Agency (PDEA)-7 ug Naval Forces Central (Navforcen) kagahapon sa hapon alas-2 pasado diha sa A. Lopez sa barangay Labangon ning siyudad.

Apan nakaikyas ang subject sa buy bust operation nga naila lang sa pangalang ‘Yugan’ nga giingong maoy gikasabot sa asset sa Navforcen.

Si Levi Ortiz sa PDEA-7 mitug-an sa mga tigbalita nga migamit sila og P200 mil nga budol money atol sa maong operasyon.

Si Ensign Joseph Ison sa Navforcen mitug-an sa mga tigbalita nga ang tag-iya sa cocaine gikan sa lalawigan sa Samar maoy nanawag sa ilang asset ug mitanyag kun dili ba kini mopalit og cocaine.

Nagsugod ang sabot-sabot niadto lang Sabado sa gabii ug miingon ang tag-iya sa cocaine ngadto sa ilang asset nga magpadala lang siya og tawo dinhi sa Sugbu hinungdan nga nakig-alayon sila sa PDEA-7.

Matud ni Ortiz nga kagahapon pa sa buntag miabot dinhi si Yugan ug mikontak dayon sa asset sa Navforcen.   

Unang lugar nga nasabotan nga adto ang binayranay sa cocaine diha sa Villagonzalo apan nagduda si Yugan hinungdan nga mibalhin na sab kini diha sa Ponce apan mao lang gihapon ug misugyot ngadto nalang sa A. Lopez kagahapon sa hapon.

Si Ortiz nagkanayon pag-abot palang sa asset diha sa A. Lopez nga nagsakay og motorsiklo miduol dayon si Yugan ug gihatag ang brick sa cocaine nga gisulod og plastic bag apan nakabantay kining awtoridad ang iyang gikasabot ug wala na gani kuhaa ang kwartang ‘budol money’ nga gihuptan sa ilang asset. - BANAT NEWS