Edukasyon prayoridad ni Frasco

CEBU, Philippines - Gihatagan og prayoridad ni Mayor Vincent Franko “Duke” Frasco ang sektor sa edukasyon sa kabataan sa kabarangayan sa maong lungsod.

Si Mayor Frasco mipadayag niini sa iyang pagduaw sa nagkalainlaing publikong tulunghaan sa kabarangyan sa Liloan sa miaging adlaw.

Matud pa ni Frasco nga gusto niya nga ang mga tinun-an sa kabarangayan kahatagan dayon og pagtagad ang ilang panginahanglan ilabi na sa umabaot nga pagbukas sa klase sa bulan sa Hunyo niining tuiga.

Nagkanayon si Frasco nga iyang nakita ang kamahinungdanon sa pagpalambo sa edukasyon sa kabataan sanglit mao kini ang bugtong paagi sa pag-andam sa ilang maayong kaugmaon inig kahingkod na nila sa panuigon.

Gitataw niya nga ang iyang buhatan maningkamot sa pagtubag sa panginahanglan sa kabataan aron molambo ang ilang pagtuon pinaagi sa pagpatukod og dugang lawak saringan ug pagmontar og mga kahimanan nga magamit kaayo sa ilang pagtuon.

Si Frasco miingon nga ang iyang buhatan kanunay nga nakig-alayon sa kagamhanan sa lalawigan sa matag bukas sa klase sa elementarya pinaagi sa pagpanghatag og mga galamiton sa mga tinun-an sama sa notebook, lapis ug uban pa.

Midugang siya nga padayong gipakusgan sa kagamhanan sa lungsod ang pagpatuman sa scholarship program alang sa mga kabus apan utokan nga mga kabataan. (BANAT NEWS)