Mga edipisyo sa Talisay gimonitor

CEBU, Philippines - Ang mga edipisyo sa dakbayan sa Talisay lakip na ang mga tunghaan padayong gi-monitor sa Talisay City Engineering Office, matud pa ni City Engineer Audie Bacasmas.

Si Bacasmas nga nahinabi sa Banat News kagahapon nagkanayon nga matag adlaw adunay mga sakop sa iyang buhatan nga maglibot-libot sa siyudad ug magsusi sa mga edipisyo kung wala ba kini mga problema aron malikayan ang disgrasya.

Matud niya nga ang Cansojong National High School nga may duha ka andana nga building nabantayan sa inspector nga adunay mga liki sa sawog hinungdan nga girekomendar nila kining ipa-ayo ug palig-onon.

Gawas sa Cansojong, may tunghaan usab sa barangay Pooc nga nasuta nga huyang busa ila usab nga girekomendar nga ipaayo.

Gawas niining mga edipisyo sa gobyerno, susihon usab sa city engineering ang mga pribadong estraktura kung misubay ba kini sa mga safety measures.

Si Bacasmas nagkanayon usab nga ang katalagman sama sa nahitabo sa New Zealand diin ang kusog nga linog didto mutay-og sa daghang mga edipisyo ug daghan ang nangamatay, dili mapugngan tungod kay mugna kini sa kinaiyahan.

Busa matud pa niya nga mas maayong mangandam nga daan ang tanan pinaagi sa pagsunod mga panginahanglan ilabi na ang gipangayo sa ilang buhatan aron walay mabasol kun ugaling adunay mga katalagman nga mahitabo.

Si Bacasmas midugang nga sa dakbayan sa Talisay walay mga tag-as kaayong mga edipisyo nga labing delikado kung adunay linog nga mahitabo.

Sa laing bahin, ang kagamhanan sa Talisay kanunay usab kining nagpahigayon og mga drill sa mga tunghaan, pribadong mga establisamento ug sa mga bukirang barangay ug daplin sa kabaybayonan, ug   kasapaan, agi og panagana kun ugaling may mahitabong mga emerhensiya sama sa linog, sunog ug baha aron ang mga tawo nga anaa sa usa ka lugar nga hingtungdan sa insidente makahibawo na sa ilang buhaton sa pagluwas sa ilang kaugalingon ug ngadto sa nagkinahanglan og tabang. (BANAT NEWS)