Seguridad andam na sa Semana Santa

CEBU, Philippines - Giklaro ni Gobernador Gwendolyn Garcia nga giandam na ang seguridad sa lalawigan busa walay angay ikabalaka ang mga Sugboanon atol sa Semana Santa karong umaabot Abril 21 hangtud 22 ning tuiga.

Matud pa sa gobernador pabantayan niya pag-ayo ang mga terminal ug mga pantalan alang sa mga tawo nga manguli sa kalungsoran ug moduaw sa ilang mga kabanay sa ilang tagsatagsa ka lungsod.

Matud pa ni Garcia nga naplanohan na sa iyang buhatan ang pagbutang og hugot nga seguridad sa Cebu South Bus terminal nga sagad hugpaan sa daghang mga pasahero nga mouli sa kalungsoran sa habagatan ug amihanang bahin sa lalawigan.

Kini pinaagi sa pagdugang sa mga security personnel nga mga kapolisan gikan sa Cebu Provincial Police Office (CPPO) sa South bus terminal.

Dugang pa niya nga lakip sa iyang pabutangan og mga kapulisan ang mga simbahan sa kalungsoran aron masiguro gayud ang kaluwasan sa mga katawhan nga magsa-ulog sa maong adlaw. (BANAT NEWS)