43-anyos milayat sa boarding house patay

CEBU, Philippines - Maayong pagkabuak sa ulo sa usa ka lalaki human kini mi-ambak sa boarding house sa iyang pag-umangkon pasado alas-6 sa buntag kagahapon sa Stone Hills Subdivision sa barangay Kalunasan.

Ang miambak mao si Jerry Gonzales, 43, molupyo sa Purok 2, barangay Mambilis Dawis, Bohol.

Padayon pa ang imbestigasyon sa kapolisan sa hinungdan sa gituohang pag-ambak ni Gonzales ngadto sa iyang kamatayon.

Sa imbestigasyon sa kapolisan nasayran base sa gibutyag sa 15-anyos nga saksi, iyang nakita ang biktima nga nahagbong gikan sa bintana sa second floor sa boarding house nga gipanag-iya sa usa ka Boyen Ricafort.

Ang mga silingan nga nautingkay sa maong hitabo daling mitabang sa biktima ug mitawag sa Emergency Rescue Unit Foundation (ERUF) ug gidala kini sa Vicente Sotto Memorial Medical Center apan gideklarar kini nga dead on arrival.

Matud pa nga grabe ang kadaot nga naangkon niini sa iyang ulo nga maoy gituohang nakaingon sa iyang hinanaling kamatayon.

Si Gonzales giila nga uyoan sa usa ka nagpailang RV Joy Remplano, usa ka sakop sa Bureau of Jail Management and Penology. Wala siya diha sa iyang balay atol sa pagkahitabo.

Si Remplano mibutyag sa mga imbestigador nga mibisita ang uyoan ug asawa niini diha sa iyang boarding house sa milabay’ng adlaw kuyog sa iyang asawa.

Matud pa ni PO3 Michael Codaste, sa Homicide Section sa Cebu City Police Office nga posibleng adunay dakong problema si Gonzales nga gidudahan nilang naghikog.

Gibana-bana nga adunay 15 ka tiil ang gitas-on sa gi-ambakan ni Gonzales. (BANAT NEWS)