Balay gi-granada

CEBU, Philippines - Balay sa usa ka dakong opisyal sa dakbayan sa Carcar gilabay og granada sa wala mailhing mga lalaki kagahapon sa kaadlawon diha sa barangay Bulinawan sa nahisgutang siyudad.

Wala hinuoy nasakitan sa maong pagpamomba human si Carcar City administrator Edgardo Oca, 52, uban sa iyang pamilya diha sa sulod sa ilang balay nangatulog atol sa hitabo.

Si SPO1 Joel Pananganan, duty desk officer sa Carcar Police Station nga nahinabi sa Banat News kagahapon mibutyag nga nakamata na lang ang pamilyang Oca dihang nakadungog sila og lanog kaayong buto sa ilang balay.

Sa ilang pagsusi naguba na ang parte sa ilang terasa sa ikaduhang andana.

Nakuha sa kapolisan diha sa nahitaboan ang usa ka “safety lever pin” sa hand grenade ug ilaha na kining gipadala ngadto sa Philippine National Police (PNP) Crime Laboratory aron masusi kung unsang klase sa granada ang gilabay ngadto sa balay ni Oca.

Si Pananganan nagkanayon nga base sa ilang pagsukit-sukit sa banay ni Oca wala silay mahinumdumang gikaaway ug wala usab kini makadawat og mga pagpanghulga hinungdan nga nahibulong ang biktima kung nganong gilabay og granada ang iyang balay. Ang kapolisan padayon sa ilang follow-up nga imbestigasyon kabahin sa hitabo aron mailhan ang responsible sa pagpanglabay sa granada ug masayran ang motibo niini.

Si Oca nga nahinabi sa Banat News sa telepono kagahapon nagkanayon nga wala siya’y nahinumdumang nakaaway nga mobuhat niya sa ingon bisan sa iyang mga anak wala usab kini makakita og kaaway ug wala usab sila makadawat og mga pagpanghulga.

Gibutyag ni Oca nga tibuok niyang pamilya niadtong higayona diha sa balay hinanok na sa pagkatulog apan naulpot na lang silang tanan dihang miuyog ang ilang balay dungan sa lanog kaayong buto.

Ang balay ni Oca nahimutang daplin sa karsada atbang sa Bulinawan Elementary School. Si Oca kanhi konsehal sa Carcar ug niadtong Hunyo sa milabay’ng tuig napupos ang iyang termino ug gitudlo siyang city administrator sa mayor karon nga si Mayor Nicepuro Apura sugod niadtong Hulyo 1, 2010.

Si Oca walay pagduda nga kabahin sa politika ang motibo sa pagpanglabay og granada diha sa iyang balay.

Ang hepe sa Carcar Police Station nga si Chief Inspector Ali Baron nagkanayon nga ipatawag niya siya Oca aron mangutana og uban pang impormasyon.

Matud usab ni Baron nga usa sa ilang gilantaw mao nga dunay nasuko kang Oca tungod sa hugtanon niining pag-implementar sa pag-demolish o paglarot sa mga manindahay og ‘chicharon’ diha sa Rotunda.

Gawas nga si Oca maoy sinaligan sa mayor sa demolisyon higpit usab kining magpahigayon og inspection sa mga karne diha sa ilang merkado.

Sa laing bahin, si Sr. Supt. Patrocinio Comendador, officer-in-charge (OIC) sa Cebu Provincial Police Office (CPPO) mimando na kang Baron sa pagpalawom sa imbestigasyon.

Mipadala na usab siya og mga sakop sa Special Reaction Unit (SRU) ngadto sa lugar aron motabang sa imbestigasyon ug magbantay usab sa palibot diha sa lugar nga nahitaboan.

Si Comendador natahap usab nga kabahin sa nahitabong demolisyon o ba kaha sa politika ang paglabay og granada sa balay ni Oca.

Ang OIC sa CPPO midugang nga duna na silay development sa follow-up nga imbestigsyon apan nagdumili siya sa pagbutyag niini. (EIM) (BANAT NEWS)