CEBU, Philippines - Usa ka wala hiilhing lalaki kinsa gituohang dili kaantigo molangoy, nalumos samtang naligo didto sa Talisay beach resort kagahapon sa alas 6:30 sa buntag.
Ang nahisgutang lalaki gihulagway sa mga polis nga naa na sa hingkod nga edad, sapsingon ang gidak-on sa lawas ug puti-on ang pamanit.
Nakit-an siya nga naglutaw na sa dagat sa usa ka molupyo sa maong lugar kinsa dali nga mitawag sa kapolisan sa Talisay City Police Station.
Sila si SPO3 Sherwin Abellare, PO3 Narciso Alforque, PO2 Aquiles Bandong ug PO1 Jundave David maoy daling miresponde sa maong report.
Naabtan sa mga polis ang mga molupyo ug mga mananagat sa maong lugar nga nagtinabangay sa paghaw-as sa lawas patay aron dad-on ngadto sa baybayon.
Gani gigamitan pa og pukot sa mga mananagat aron pagbaswat niini ngadto sa baybayon.
Gihatod dayon nila ang biktima ngadto sa Talisay City District Hospital diin didto ideklarar nga patay na kini.
Nagtuo ang kadaghanan nga dili kaantigo molangoy ang biktima tungod kay sa sayo pa nakita nila kining nagsakaysakay og salbabida samtang naligo.
Apan nakurat nalang ang mga molupyo dihang nahanaw ang biktima samtang ang salbabida nalay naglutawlutaw sa dagat. (WC) (BANATNEWS)