Gibulit og dunggab

CEBU, Philippines - Usa ka lalaki ang namatay human kini gidunggab sa makadaghang higayon sa wala pa mailhing mamumuno samtang kini naglakaw padulong na mopauli sa ilang pinuy-anan gikan nakig-inom sa iyang mga higalang babaye kagahapon sa tungang gabii.

Ang insidente nahitabo diha sa sitio Barbak sa barangay Duljo Fatima siyudad sa Sugbu pasado alas-3 kagahapon sa kaadlawon. Si Erwin Montalban Abellana, 32, minyo, walay trabaho ug nagpuyo sa sitio Bohol Village sa nahisgutang barangay napalgan nga nag-ubo sa kanal ug patay na nga nakaangkon og daghang samad dinunggaban sa nagkadaiyang parte sa iyang kalawasan.

Si PO2 Edario Manatad sa Homicide nga nahinabi sa Banat News sa telepono mitug-an nga dunay daghang samad sa bukobuko ang biktima.

Si PO3 Victor Ruel Ayuman nga maoy nangulo sa imbestigasyon mibutyag nga ila pang i-background check ang biktima kun unsay kalihukan niini diha sa nahisgutang lugar sanglit nakadawat sila og impormasyon nga gikan nang nabilanggo sa Cebu City Jail (kanhi BBRC) ang biktima. (BANATNEWS)