CEBU, Philippines - Nangandam na alang sa umaabot nga Semana Santa ug sa bakasyon ang Philippine Coast Guard Central Visayas ug higpitan ang pagpatuman sa kaluwasan sa mga pasaheroang barko ilabi na sa overloading.
Ang PCG molusad sa Oplan Mahal na Araw matud pa sa tigpamaba sa Coast Guard Central Visayas nga si deputy commander Anelito Gabisan sa pakighinabi sa Banat News.
Hugot nga seguridad ang ipatuman sa tanang pantalan sa Central Visayas lakip na niini ang pantalan sa Sugbo ug adunay ibutang nga Public Assistance Centers ug bukas kini 24/7 alang sa mga pasahero nga adunay mga problema sa ilang pagbiyahe.
Samtang susihon usab ang mga barko gikan sa ilang life saving equipment ug kapasidad sa mga tripulante sa mga barkong pasaheroan aron masiguro ang kaluwasan niini paglawig sa kadagatan.
Si PCG commandant Admiral Wilfredo Tamayo sa gipagawas nga news release sa ilang website, mimando sa tanang Coast Guard Districts sa paghigpit sa pag-monitor sa ilang hurisdiksyon, kini naglakip sa estriktong pagpatuman sa mga polisiya sa boarding teams ug ang paghigpit gyud sa overloading.
Gimando usab niya sa iyang mga sakop nga kinahanglang mangandam ug preparado sa tanang alarma sa kadagatan lakip na ang ilang mga barko aron makaresponde dayon.
Samtang iyang giawhag ang tanang local government units sa nasud sa pagpahigayon og mga life-saving courses ug water search-and-rescue courses ilabi na sa mga residente daplin sa kabaybayunan aron matudloan sila sa gikinahanglang kaalam aron masigurong luwas ang kadagatan.
Ang PCG–Cebu mipahigayon na sa ilang Water Search and Rescue Training (WASART) nga giapilan sa nagkadaiyang rescue groups sa mga Local Government Units.
Matod pa ni Gabisan nga ang maong training ilang gihimo kini aron sa pagpangandam unya kun ugaling adunay mahitabong kalamidad sa kadagatan ug nagkinahanglan kini og tabang sa mga responders. (BANATNEWS)