Mikulata sa kaaway napusilan patay

CEBU, Philippines - Gipusil patay ang usa ka habal habal drayber sa laing drayber sa habal-habal nga gilupig niya sa sukmagay atol sa ilang away diha sa sitio Capulay barangay Tayud lungsod sa Liloan niadtong Biyernes sa alas 10:30 sa gabii.

Ang biktima mao si Renel Sugarol, 24, molupyo sa sitio Simborio barangay Tayud samtang ang suspek mao si Jolito Abiar alyas Jojo, 28, taga sitio Fatima barangay Jubay Liloan ug usa usab ka habal habal drayber.

Matud ni PO2 Routchil Jugalbot sa Liloan Police dihang nahinabi sa Banat News ang biktima ug ang suspek daan nang nagkaaway sulod na sa pipila ka mga adlaw na ang milabay.

Giingong nag-abot ang duha sa parkingan sa mga habal habal sa maong lugar ug subling mi-ulbo ang ilang away nga miresulta sa pagsukmagay.

Apan gilupig sa biktima ang suspek hinungdan nga mikaratel kini og dagan sum-ok sa ngitngit nga bahin apan gigukod kini sa biktima ug dangtan ang pipila ka gutlo nabati nalang sa ilang mga kaubang drayber ang buto- buto sa armas.

Paglabay og pipila ka gutlo nabalik sa lugar ang biktima nga luya na ug dunay mga samad pinusilan sa lawas hinungdan nga gitabang nila kini ug gihatud sa Vicente Sotto Memorial Medical Center dinhi sa dakbayan sa Sugbo apan gideklarar nga dead on arrival.

Ang mirespondeng mga polis naka-recover og tulo ka kabhang sa bala sa kalibre .45 nga gituohang gikan sa armas nga gigamit sa suspek.

Ang kapulisan sa paghimo ning balita padayon pa sa ilang manhunt operation pagsikop sa suspek. (BANATNEWS)