CEBU, Philippines - Aduna nay onse ka mga displaced Overseas Filipino Workers (OFWs) gikan sa naggubat karong nasud sa Libya ang natabangan sa Public Employment and Services Office (PESO).
Gibutyag sa (PESO) manager Matthea Baguia ang maong OFWs maoy gihatagan og prayoridad sa Kapitolyo human gimando ni Gob. Gwendolyn Garcia nga atimanon ang mga OFWs nga nakauli sa Sugbo tungod sa kagubot sa nasud sa Libya, Yemen ug uban pang nasud kansang leader sa nasud giprotestahan.
Matud pa ni Baguia nga ang maong mga OFWs maoy labing unang nakapahimulos sa Help Desk sa matag Overseas Job Fairs nga gihimo sa PESO niadtong adlaw nga Domingo sa Cebu International Convention Center (CICC) sa siyudad sa Mandaue.
Iyang gitataw nga kapin sa 2 mil ka mga aplikante dili lamang dinhi sa Sugbo kon dili apil sad ang kasikbit nga mga probinsiya ang nakapahimulos nahisugtang overseas job fair.
Ang maong mga OFWs na-hire dayon tungod sa ilang mga kasinatian sa trabaho.
Gipahibawo usab niini nga gawas sa mga job fairs ang PESO mopahigayon usab og special recruitment activities uban ang mga lehitimong mga kompanya gikan sa gawas sa nasud aron mas daghang mga Sugbuanon ang matabangan sa kagamhanan sa lalawigan sa Sugbo. - BANAT NEWS