Lolo akusado sa paglugos sa apo

CEBU, Philippines - Nasikop kagahapon sa kapolisan ang usa ka 65- anyos nga lolo sulod sa merkado publiko sa dakbayan sa Lapulapu gumikan sa pasangil nga gilugos niini ang 13-anyos nga dalagita niyang apo.

Ang gisikop mao si Remie Cabantan, 65, minyo, nga taga Brgy. Pusok dakbayan sa Lapulapu, og usa ka manindahay ug utanon sulod sa merkado.

Base sa imbestigasyon ni PO3 Napoleon Monterosa, nasayran nga niadtong Hunyo, 2010, ang apo niining 13-anyos mipasaka kaniya og kasong pagpanglugos sa sala ni RTC Judge Victor Teves sa branch 54.

Gumikan sa maong kaso nagtago-tago si Cabantan sulod sa pipila ka bulan, apan kagahapon sa mga alas 2:30 sa kadlawon nasigpatan kini ni PO3 Monterosa sulod sa merkado publiko sa Lapulapu nga namaligya og utanon hinungdan nga iya kining gisikop pinaagi sa maong warrant of arrest nga daan nang giluwatan ni Judge Teves.

Hinuon hugot nga gipanghimakak ni Cabantan ang pasangil sa iyang apo, apan iyang giangkon nga niadtong Hunyo sa miaging tuig, iyang gikomedyahan og hikap-hikap ang lawas sa iyang apo apan wala niya kini hilabti.

Gumikan niini si Cabantan nagpahayahay na karon sa prisohan sa Lapulapu. (WC) - BANAT NEWS