Dili grabe si VG Sanchez-mga anak

CEBU, Philippines - Giklaro sa duha ka anak nga babaye ni Bise-Gob. Gregorio Sanchez, Jr. nga dili grabe ang balatian sa ilang amahan kinsa naa karon sa tambalanan.

Atol sa pag-atubang sa mga tigbalita nilang Engr. Grecilda “Gigi” Sanchez-Zaballero ug Gerlaida “Gerlie” Sanchez-Spiller kagahapon, sila nangayo og pasaylo sa ilang pagpakahilum labot sa kahimtang sa panglawas sa ilang amahan.

“My apologies for not being able to come up with family statement right away because we were more focus on getting the best medical treatment we have available,” matud pa ni Gigi.

Gipadayag ni Gigi nga nag-atubang og dakung hagit ang ilang pamilya sa pagkakaron ilabi na nga masakiton usab ang ilang inahan.

Si Gigi miingon nga ang doktor mipasalig nga maayo pa ang sakit sa ilang amahan ug nagkinahanglan lang kini og igong pahulay hinungdan sa ilang panawagan sa mga kahigalaan nga hatagan lang una sa gikinahanglan pahuway si Sanchez.

“Para namo it is the long overdue rest that he needs and I hope we be given a little privacy after so we can focus on his fast recovery. Well meaning prayers are most welcome,” sumala pa ni Gigi.

Gipasalig ni Gigi nga ilang ipahibalo sa publiko ang unsa mang resulta sa pakisusi sa doktor sa panglawas sa ilang amahan.

Sa pagkakaron, matud pa ni Gigi nga makabarug ug makakaon ang ilang amahan ug gani namirma pa kini og mga papeles ug sukwahi sa taho nga anaa na sa lisud nga kahimtang.

Giangkon sa duha ka anak ni Sanchez nga nasubo sila sa taho sanglit sukwahi kaayo kini sa ilang nakita sa ilang amahan.

“We are sad. We’ve seen our father and not that really grabe as what we are reading,” matud pa ni Gerlie. - BANAT NEWS