Transport group miprotesta vs. oil price

CEBU, Philippines - Nilusad ug lihok protesta ang kahugpungan sa mga drayber dinhi sa Sugbo Ug militanteng pundok atubangan sa buhatan sa Department of Energy (DOE) 7 ug gipalanog nila ang pagsaway sa gobiyerno nunot ning sunod sunod nga pagsaka sa presyo sa produktong petrolyo.

Gibanabanang moabot ngadto sa 120 ngadto sa 150 ka mga drayber nga sakop sa Nagkahiusang Drayber sa Sugbo (NADSU) ug sakop sa militanteng pundok nga Bayan Muna Central Visayas ang misalmot sa maong lihok protesta.

Gibutyag ni Roy Apura ang chairman sa NADSU dihang nahinabi sa Banat News, tumong nila ang pagpalanog ngadto sa gobiyerno ilabina ning panahon ni Presidente Benigno Aquino III ang dinali-ang aksiyon alang sa pagbasura sa Oil Deregulation Law nga maoy gituohan nilang hinungdan ning kanunay’ng pag-omento sa presyo sa lana.

Matud ni Apura apil sa ilang nakahan-ay nga demanda mao ang pagwagtang sa gipatuman nga 12 porsiyento nga Value Added Tax (VAT) sa mga produktong petrolyo.

Ingon man usab ang pag- nationalized sa industriya sa lana dinhi sa nasud, pagtangtang sa over pricing ug labaw sa tanan pagpatuman og rollback sa presyo sa tanang produktong petrolyo.

Nunot niini gisalikway sa NADSU ang gipakanaog nga desisyon sa Malacañang nga paghatag og subsidy sa gobiyerno sa sektor sa transportasiyon tungod kay alang kang Apura usa lang kini ka pag-‘ulog ulog’ kanila sa gobiyerno ug dili maoy tubag sa ilang giduso nga mga yangungo.

Human sa ilang pipila ka minutos nga kalihukan atubangan sa buhatan sa DOE-7 diha sa may dalan Osmeña Boulevard nagbaktas ang maong grupo paingon sa Land Transportation Office (LTO-7) ug didto ila usab nga gilusad ang protesta batok sa gihulagway nila nga subsob nga pagpanakop sa mga deputized agents niini ngadto nilang mga drayber. (BANATNEWS)