Nagpabuto kay hubog napaslak sa karsel

CEBU, Philippines - Nasakmit sa kapolisan ang usa ka shotgun ug kalibre .38 nga armas gikan sa usa ka tawo nga kalit lang nagpabuto alas-10 pasado ang takna sa miaging gabii sa sitio Bas sa barangay Pagsabungan, dakbayan sa Mandaue.

Ang suspetsado mao si Cesar Maga Rodrigo, 46, nga taga Pier 1 sa dakbayan sa Sugbo ug gipiyalan sa pagbantay sa usa ka manokan nga nahimutang sa maong lugar.

Si SPO2 Eduardo Pasaylo sa kapolisan sa Presinto 3 sa Basak Police Station miingon nga nakig-inom ang suspetsado uban sa iyang mga higala ug dihang nahubog kalit kining nagpabuto sa makadaghang higayon.

Dugang pa niya nga natugaw ang mga molupyo sa maong dapit nga hinungdan nga nanawag og polis, ang suspek naabtan pa sa kapolisan nga nagbitbit og armas nga wala diay lisensiya hinungdan sa pagkaaresto kaniya. (EIM) (BANATNEWS)