2 barko nagbag-id

CEBU, Philippines - Luwas ang tanang mga pasahero ug tripulante human magkabangga ang barkong pasaheroan sa Superferry-2 ug ang cargo vessel nga M/V General Romulo didto sa kadagatan sa Lawis sa dakbayan sa Talisay alas 5:50 kagahapon sa buntag.

Ang Superferry-2 nga gipanag-iya sa Negros Navigation gikan sa Nasipit, Agusan samtang ang M/V Gen. Romulo nga gipanag-iya sa MMC Container gikan usab sa Cagayan De Oro City nga pulos paingon dinhi sa Sugbo.

Apan pag-abot sa maong lugar giingong aksidenteng nabag-iran sa Superferry-2 ang M/V Gen. Romulo nga miresulta sa pagkagaras sa pintal sa walang bahin sa Superferry-2 ug ingon man ang kilid usab sa cargo vessel giingong nalumping.

Tungod sa hitabo duha ka container vans nga karga sa M/V Gen. Romulo nga may sulod nga kinartong mga gatas ang nayabo sa dagat ug nanglutaw.

Gipistahan kini sa mga mananagat og panghagdaw ug gipamaligya sa kantidad nga P40 ngadto sa P50. Bisan nangabasa ang karton sa gatas gisulod man kini og plastic diha sa ilawom maong napuslan pa.

Ang Superferry 2 midunggo diha sa Cebu International Port (CIP) mga alas 7:30 kagahapon sa buntag ug luwas ang tanang 520 ka mga pasahero ug 116 ka tripulante niini.

Gibutyag ni Cebu Coast Guard Station Commander Rolando Punzalan dihang nahinabi sa Banat News  nga wala una nila tuguti ang duha ka barko apan kagahapon sa hapon nakadawat sila og kopya sa certificate of sea worthiness nga giisyu sa MARINA ngadto sa Superferry 2 maong nakabiyahe kini mga ala 1:15.

Si Punzalan mimando sa duha ka barko nga mosumitir sa ilang marine protest kabahin sa hitabo sulod sa 24 oras.

Ang NMC Container Lines, Inc. Cebu branch nga maoy shipping company sa M/V Romulo ug Negros Navigation nga shipping company sa Super Ferry ang gisuwayan sa pagtawag apan ang mga nakatubag sa tawag sa duha ka buhatan nagdumili sa paghatag og komento kabahin sa hitabo ug nagdumili usab sila sa paghatag sa ilang mga pangalan.  (BANATNEWS)