Death penalty di maayo - Paredes

MANILA, Philippines - Si Regional Trial Court (RTC) Judge Mienrado Paredes kagahapon nagkanayon nga ang “death penalty” nakalapas gayud sa tawhanong katungod ug dili maoy tukmang paagi sa pagsumpo sa palusot sa ginadiling drugas.

Ang maong pamahayag ni Paredes iyang giluwatan dihang gipatay pinaagi sa lethal injection kagahapon didto sa nagkalainlaing prisohan sa China ang tulo ka mga OFW   nga nakonbikto sa kasong drug trafficking didto sa China.

Gitawag silang “drug mule” o tigpayuhot sa ginadiling drugas nga gisuholan sa mga sakop sa sindikato sa illegal nga drugas didto sa China.

Si Paredes kinsa miyembro sa commission on human rights nagkanayon nga dili silot sa paghunos sa kinabuhi sa tawo maoy makapahunong sa patigayon sa ilegal nga drugas nga mikuyanap na sa kalibotan karon.

Hinuon miingon siya nga girespetohan niya ang balaod ug pamaagi sa China. “Wa tay mahimo it’s their punishment to all people who violated their law”, matud ni Paredes.

Midugang siya nga ang kagamhanan dinhi sa nasud walay nahimong kalapasan sa gipahigayong follow-up niini bahin sa execution sa tulo ka mga OFW.

Dugang ni Paredes nga isip miyembro sa human rights gusto gyud niya nga mawagtang ang death penalty sa China.

“Let us all be fair in implementing laws, death penalty must be abolished because it is deterrent to drugs case”, dugang pa sa maong huwes.

Dinhi sa nasud, gihunong ang pagpatuman sa maong balaod dihang misulbong ang daghang petisyon sa pagsupak niini.  - BANAT NEWS