Senior citizen sa Talisay makadawat og P500

CEBU, Philippines - Ang mga senior citizen (SC) sa dakbayan sa Talisay makadawat unya og P500 nga binuwan nga pension gikan sa kagamhanan sa maong dakbayan

Kini pinaagi sa gipasar nga resolusyon sa konseho sa dakbayan atol sa regular nga sesyon nila sa miaging Martes.

Ang maong resolusyon nagtugot kang Mayor Socrates Fernandez nga moluwat og memorandum of agreement tali sa Department of Social Welfare and Development (DSWD) alang sa implementasyon sa programa sa paghatag og social pension sa mga kabus nga SC .

Base sa resolusyon nga gipangamahanan ni Konsehal Celiapo Cabuenas, chairman sa committee on Social Welfare and Services nga ang maong programa gipahaom sa Akta Republika Numero 9994 nga mao ang “Expanded Senior Citizens Act of 2010”.

Ang DSWD maoy gitahasan sa pag-implementar sa nahisgutang special pension program pinaagi sa paghatag og P500 pension matag buwan sa mga SC subay usab sa balaod.

Si Cabuenas midugang nga ubos sa DSWD National Household Targeting System for Poverty Reduction (NHTS-PR) naila ang Talisay nga adunay daghang kabus nga mga SC nga angayang makapahimulos sa nahisgutang pension.  - BANAT NEWS