CEBU, Philippines - Patay ang usa ka panadero human kini makuryentihi dihang didto matumba sa livewire ang puno-an sa kawayan nga iyang giputol didto sa barangay Buenavista sa siyudad sa Carcar niadtong Lunes sa alas 8:30 sa buntag.
Ang biktima mao si Mario Panginahug, 33, molupyo sa nahisgutang lugar ug usa ka panadero sa usa sa mga bakery nga nahimutang sa maong siyudad.
Matud ni PO3 Ruben Reynes sa Carcar City Police dihang nahinabi sa Banat News ang biktima namutol sa mga puno-an sa kawayan nga iyang gamiton sa balay.
Samtang namutol gamit ang sundang usa sa mga puno-an sa kawayan didto matumba paingon sa gikutay nga live wire paingon sa usa ka panimalay gikan sa poste sa kuryenti.
Tungod kay basa pa ang punoan sa kawayan ang biktima nga naggunit sa sundang nga nagtaop sa puno-an sa maong kawayan mikirig kini.
Ang mga silingan sa biktima mao nay nitabang sa biktima ug nihatud dayun sa Carcar City District Hospital human nawad-an na kini sa panimuot ug didto gideklarar sa mga doktor nga dead on arrival.
Gani atol sa pagsukit sukit sa kapulisan ang mga kabanay niini nagdumili nalang kini nga ipaubos pa sa autopsy ang patay’ng lawas sa biktima. (BANAT)