CPPO wa na sad kuryente

CEBU, Philippines - Sa ikaduhang higayon nagsuga na usab og lamparilya ug kandila ang Cebu Provincial Police Office (CPPO) human subling giputlan og kuryente sa Visayan Electric Company (Veco) kagahapon sa hapon.

Base sa kasaligang tinubdan sa Banat News nagkanayon nga ala-una pasado gahapon sa hapon giputlan og kuryente ang CPPO hinungdan nga atol nga nagpatawag og tigom si Sr. Supt. Patrocinio Comendador Officer in Charge (OIC) sa CPPO ngadto sa iyang mga sakop nag-iyahay nalang og pamaypay tungod sa kainit.

Kini maoy ikaduha nang higayon nga giputlan sa Veco ang CPPO diin ang una niini niadtong miaging buwan human wala mabayri ang P386,342.97 nga bayranan sulod sa usa ka tuig.

Apan matud sa kasaligang tinubdan nga P30 mil ra ang gibayad ngadto sa Veco ug dunay gisaad ang PNP nga P200 mil aron idugang unta og bayad sa kapin P300 mil nga utang apan hangtud karun wala pa maabot ang maong budget hinungdan nga naputlan sila og suga kagahapon.

Si Comendador sa interbyu kagahapon sa TV Patrol Central Visayas miingon nga nabayran na nila ang kuryente kagahapon sa hapon apan wala dayon kini mabalik og taod.

Matud pang Comendador nga mideposito na ang Police Regional Office-7 og tseke nga P200 mil alang sa balayrunon ug nagtuo siyang karong adlawa mabalik kini dayon. (Rey Pasaporte/EIM) (BANAT)