NPA miatake

CEBU, Philippines - Usa ka 14-anyos nga batang babaye, namatay human maigo sa saag nga bala atol sa nahitabong pagpangatake sa mga gidudahang sakop sa rebeldeng New Peoples Army kagahapon sa tungang gabii sa duha ka mga lugar sa Negros Occidental.

Ang pagpangatake natigayon atol sa adlaw sa kasaulogan sa anibersaryo sa NPA.

Nahitabo kini didto sa sitio Pulopangyan sa barangay Bug-ang sa lungsod sa Toboso ug sitio Cubay sa barangay Bato siyudad sa Sagay Negros Occidental.

Si Lt. Col. Christopher Tampus ang tigpamaba sa Central Command nga nahinabi sa mga tigbalita miila sa biktima nga mao si Baying Amion nagpuyo sa sitio Pulopangyan sa barangay Bug-ang lungsod sa Toboso.

Si Amion nahiagom og samad pinusilan sa nawong ug milapos ang bala diha sa iyang ulo samtang kini natulog sa ilang balay dili layo sa giatakeng detachment.

Matud ni Tampus unang gisulong sa mga rebeldeng NPA ang detachment sa Citizen Armed Forces Geographical Unit (Cafgu) nga nahimutang sa sitio Pulopangyan.    

Gisuwayan pa unta pagdala ang biktima sa tambalanan apan gideklarar kini sa mga doktor nga dead on arrival.

Ang mga tropa sa gobiyerno sa maong detachment nasurpresa sa kalit nga pagpangrakrak nga milanat og tulo ngadto sa lima ka minutos.

Human niini daling misibat ang mga NPA apan dangtan 20 minutos ang nakalabay usa ka motorsiklo nga dunay sakay nga armadong mga tawo ang mibubo og gasolina ug gidagkutan ang karsada ug mipabuto sa ilang armas diha sa sitio Cubay sa barangay Bato.

Gibana-banang duha ngadto sa tulo ka kilometro ang distansya gikan sa headquarters sa 62nd Infantry Battalion.

Matud ni Tampus mimugna lang gyud og kasamok ang mga gidudahang sakop sa NPA agi’g ‘compliance’ sa ilang kasaulogan aron duna silay ika-report ngadto sa ilang mga labaw.

Bisan paman sa maong pagpangataki kagahapon, giawhag ni Tampus ang ilang kaaway nga unta ikunsiderar ug motamod sa gikasabotan kabahin sa ‘peacetalks’ tali sa militar ug NPA.(EIM) (BANAT)