VM Marlon Garcia may kaso sa Ombudsman

CEBU, Philippines -  Nasuta sa Ombudsman Visayas nga adunay igong kapasikaran ang kasong administratiba nga nag-ugat sa grave misconduct nga kiha nga gipasaka ni Barili mayor Teresito Mariñas batok sa iyang bise mayor Marlon Garcia nga igsoon ni Gobernador Gwendolyn Garcia.

Gumikan niini gi-upgrade sa Ombudsman Visayas ang maong reklamo aron ikapahigayon ang administrative investigation batok kang Vice Mayor Garcia ug mi-obligar sa naulahi sa pagtubag sa maong kiha.

Si Deputy Ombudsman for the Visayas Pelagio Apostol mihatag sa bise mayor og 10 ka adlaw nga tagal sa pagtubag sa maong reklamo.

Si Mayor Mariñas miduso og kasong grave misconduct batok sa iyang besi mayor human siya (Mariñas) insultoha ni Garcia atol sa sesyon sa konseho niadtong bulan sa Agosto sa milabay’ng tuig.

Sa maong higayon mitambong si Mariñas sa sesyon aron unta depensahan ang gahin nga giindorso ngadto sa konseho aron ipalit og CCTV camera alang sa lungsod.

Nasuta sa Ombudsman ang merito sa maong reklamo hinungdan nga gi-upgrade kini aron kapahigayonan og pormal nga administrative investigation.

Sa maong mando ni Ombudsman Apostol kini nagbahad nga kun mapakyas si Garcia sa pagduso sa iyang komentaryo sa maong kiha sulod sa napulo ka adlaw magpadayon ang pormal nga imbestigasyon sa kaso pinasubay sa lagda sa maong ahensya.

Gisuwayan sa pag-kontak ning tigbalita ang Sanguniang Panlungsod (SP) office aron pagkuha sa habig ni Bise Mayor Garcia kagahapon sa hapon apan matud sa nakatubag nga staff sa SP office nga si Cathy wala sa iyang buhatan ang bise mayor ug nagdumili usab kini paghatag sa iyang cell number.

Samtang gisuwayan usab unta og kontak si Mayor Marinas apan nagdumili na kini paghatag og dugang komentaryo sa kaso aron dili maduhigan og kolor sa politika tungod kay gitugyan na niya kini sa Ombudsman.

Napanglantawan nga si Mayor Marinas ug Bise Mayor Garcia nga kanhi kaalyado maoy posibleng mag-atbang sa eleksyon unya sa 2013. (BANAT NEWS)