Badlongon giliog pagpusil

CEBU, Philippines -  Usa ka 17-anyos nga batang lalaki nalandig sa tambalanan human kini lioga pagpusil sa wala hiilhing tawo sa barangay Lawaan III, dakbayan sa Talisay sa miaging adlaw.

Si PO3 Edwin Alvarado nagkanayon nga base sa ilang nahipos nga report nga ang biktima giingong badlongon kaayo ug gani gipasanginlang kawatan   sa ilang mga silingan.

Matud ni Alvarado nga mibutyag ang inahan sa biktima nga sa wala pa pusila ang iyang anak, usa sa ilang mga silingan ang miduol kaniya ug nagkanayon nga ipadesiplina ang iyang anak kay kung dili niya kini madisiplina, sila maoy modisiplina niini.

Apan ang maong bahad wala lang hatagi og gibug-aton sa inahan sa biktima.

Pila ka adlaw ang milabay usa ka wala hiilhing lalaki kalit lang mitunga ug gipusil ang biktima samtang nagtalikod.

Human sa maong pagpamusil, mibiya usab dayon ang kriminal sa maong dapit.

Sa laing bahin, usa ka motorsiklo ang gibiyaan sa usa ka giingong kawatan kagahapon sa kadlawon didto sa barangay San Isidro, dakbayan sa Talisay.

Ang nahisgutang motorsiklo usa ka Yamaha Crypton nga kolor puwa nagtangag sa plakang GU-2017.

Base sa report nga usa ka wala hiilhing lalaki nga armado, mikabad og dagan dihang naapiki kini pag-abot sa mga tanod nga nag-roving.

Gituohan nga ang maong lalaki usa ka kawatan nga buot untang mosaka og balay sa maong lugar aron mangawat apan gidimalas tungod kay naabot ang mga tanod   ug gidaog sa iyang kahadlok. (WC) (BANAT NEWS)